تعريف الإسلام
 |
| الإسلام |
تعريف الاسلام
الإسلام هو أخر الأديان
الإبراهيمية . وأكتر دين منتشر جغرافياً على مستوى العالم موجود في كل الدول ماعدا
الفاتيكان ، وتاني دين فى عدد المعتنقين بعد المسيحية، الإسلام متأسس على القرآن، الكتاب
الى المسلمين بيعتبروه انزل من الله الواحد
على النبى محمد، والسنه النبويه (افعال وأحديث النبى محمد). الاسلام عند المسلمين هو
الدين الكامل و التنزيل المتمم لرسايل التوحيد اللى اتبعتت للبشريه قبله زى رسايل الأنبيا
ابراهيم و موسى و عيسى.
القرآن نزل على النبى محمد فى مكه فى القرن السابع الميلادى. بيعتقد المسلمين
ان الرسايل اللى سبقته و الكتب المنزله عن طريق الوحى إتبدلوا عن طريق البشر تبعاً
للأهواء و إتشوهوا مع مرور الزمن. النقطه المركزيه فى الاسلام هى التوحيد يعنى الإيمان
برب واحد مالهوش أى شريك.
اغلب المسلمين بينتمو للمذهبين الكبار و هم المذهب السنى بطوائفه و مذاهبه
الفقهيه و المذهب الشيعى بطوائفه. الاسلام بيعتبر أسرع دين انتشر فى العالم وامتد فى
فتره قياسيه من الصين شرقاً لجنوب غرب أوروبا غرباً ، و منه خرجت حضاره جديده فى العالم
هى الحضاره الاسلاميه. النهارده الاسلام هو الدين السايد فى الشرق الأوسط ، و شمال
افريقيا ، و مناطق كتيره فى اسيا و جنوب الصحرا الكبرى فى افريقيا. معظم المسلمين مش
عرب اللى بيعتبروا 20% من عدد المسلمين فى العالم ، و أكتر دوله فيها مسلمين هى اندونيسيا
و أعداد مش صغيره موجوده فى الصين و روسيا و مناطق البلقان والكاريبى. حوالى 13% من
المسلمين عايشين فى اندونيسيا اللى بتعتبر أكبر دوله اسلاميه. %31 من المسلمين بيعيشوا
فى شبه القاره الهنديه . عدد المسلمين حالياً حوالى 1.57 مليار . ده بالأضافه للى بيعتنقوا
الاسلام والمهاجرين المسلمين الموجودين تقريباً فى كل نواحى العالم. الاسلام هو أسرع
دين انتشار فى العالم
القرآن
القرآن عند المسلمين
هو كلام الله اللى انزل على النبى محمد باللغه العربيه و نصوصه هى اساس الدين الاسلامى.
المسلمين بيؤمنوا بإن أيات القرآن إتوحت للنبى محمد من الله عن طريق الملاك جبريل
كذا مره فى الفتره ما بين سنة 610 م و لحد وفاته فى 8 يونيه 632م. إتقال ان القرآن
اتدون عن طريق صحابة محمد وقت حياته و اتلقن شفوياً. القرآن إتجمع فى وقت ابو بكر اول
الخلفا الراشدين و اتوحدت كتاباته تحت اشراف عثمان بن عفان تالت الخلفا الراشدين .
الادله النصيه وضحت لعلما الدراسات الاسلاميه ان القرآن الموجود النهارده ماتغيرش من
وقت لما إتوحد. القرآن متقسّم لـ 114 سوره
فيهم 6،236 آيه. السور الاقدم ظهرت فى مكه و عامة بتختص بالمواضيع الاخلاقيه و الروحانيه.
ليست هناك تعليقات:
إرسال تعليق